Денес нови возбудувања во Трета лига – Југ со мечевите од 21. коло, каде тимот на Превалец го доби дербито со Тополка славејќи со резултат од 1:2.
Кристијан Маневски во 33. минута погоди за водство на Превалец од 0:1, но радоста траеше многу кратко бидејќи по три минути Николче Стојанов постигна гол за 1:1 на полувреме.
Во вториот дел Превалец презеде иницијатива за да бара погодок за ново водство, а кое дојде во 73. минута со голот на Ѓоре Црнушев, а воедно тоа беше и конечниот резултат.
Овој триумф е голем и важен за тимот на Превалец кој веќе две децении доминира во Трета лига – Југ, има константно одлични и големи резултати, а како и минатата сезона, така и годинава се бори за второлигашки бараж.
Ова беше натпревар за престиж и достоинство, а со новите три бодови, Превалец оди кон зацртаната цел, да се освои првото место.
Единствениот меч без погодоци беше тој меѓу Ултрас и Млекар, кои одиграа 0:0 и ги поделија бодови.
Бучин лесно стигна до трите бодови откако на домашен терен со 3:0 го доби Младост од Кривогаштани. Бојан Мицески погоди во 33. минута за отварање на резултатот, а во вториот дел со двата гола на Зоран Мирчески, домаќинот ја потврди високата победа.
Влазними Јуниор на домашен терен славеше висок триумф (4:0) над Питу Гули, во меч каде Хабија Ибраими во 5. минута го отвори резултатот, а до крајот на првиот дел Аделин Демири постигна два гола за 3:0 на полувреме.
Во вториот дел Али Фејзулоски постигна гол за конечни 4:0 и славеј на висок триумф.
Трите бодови останаа во Долни Дисан откако Венец со 2:1 славеше над Башкими од Јаболчиште. Домаќинот постигна два брзи гола стигна до два гола предност на полувреме.
Во 34. минута погоди Жарко Донев за отварање на резултатот, две минути подоцна голгетерот Кирил Неделков беше прецизен за двојна предност. Во вториот дел Елфати Тахири погоди за конечни 2:1.
Во горниот дел од табелата Борец е прв со 52 бодови, Превалец е втор со 49 бодови, а пак Венец од Долни Дисан е трет со 40 бодови. Трката за шампионската титула вредна второлигашки бараж ја одат Борец и Превалец.
