Фудбалерките на Македонија до 19 години претрпеа убедлив пораз од селекцијата на Шкотска со 9:0 во натпреварот од второто коло во квалификациите за Европското првенство.
Избраничките на селекторот Кирил Изов беа надиграни уште во првото полувреме, кое заврши со високи 5:0 за противникот.
Шкотска го отвори резултатот во 20. минута преку Софи Блек, а само девет минути подоцна Абигаил Тобин зголеми на 2:0. Во 38. минута Сиена Меголдрик погоди за 3:0, додека Ела Вест во 41. минута стрелаше за 4:0. Конечниот резултат од првиот дел го постави Лаура Бери во 44. минута.
Во второто полувреме Шкотска продолжи со доминацијата. Сиена Меголдрик постигна уште еден погодок и стана двоен стрелец за водство од 6:0. Во 74. минута Оливија Чомчук го постигна седмиот гол, а само четири минути подоцна Исла Тејлор зголеми на 8:0. Конечниот резултат од 9:0 го постави Џесика Хасбанд во 90. минута.
Ова е втор пораз за младите фудбалерки, откако во првото коло беа поразени од Норвешка со 3:0. Во последното коло, македонската репрезентација ќе се соочи со селекцијата на Австрија на 16 април.
