Во време кога голем број клубови во Македонија се соочуваат со сериозни проблеми околу инфраструктурата и условите за игра, од битолското село Ношпал доаѓа вистинска позитивна приказна која го враќа верувањето во македонскиот фудбал.
Фудбалскиот клуб Напредок, дебитант во Трета лига – Југозапад, располага со терен кој слободно може да се каже дека е пример како треба да изгледа еден фудбалски терен. Тревникот е беспрекорен – рамен, густ и максимално одржуван, на ниво на кое би му позавиделе и многу второлигашки, па дури и прволигашки екипи.
Она што ја прави оваа приказна уште повредна е фактот што зад сето тоа стои исклучиво трудот и љубовта на луѓето од клубот. Без институционална помош, со сопствени средства и рачен труд, управата и фудбалерите го одржуваат теренот – дури и со косачки за двор, што е редок и инспиративен пример за посветеност.
Не е првпат јавноста да слушне за овој „фудбалски бисер“. И претходно Спортска Мрежа пишуваше за теренот во Ношпал кој постојано е во перфектна состојба, а сега повторно потврдува дека континуитетот во работа носи резултати.
Сосема оправдано се поставува прашањето – дали можеби многу клубови од повисок ранг треба да го „побараат рецептот“ од Напредок? Во време кога често гледаме натпревари на жолти, изгорени терени, со троскот и лоша подлога, примерот од Ношпал покажува дека со вистински пристап може да се има терен на врвно ниво.
Од клубот порачуваат дека нивната цел е јасна – создавање на квалитетни услови за младите фудбалери и враќање на фудбалот како гордост во малите средини.
Напредок Ношпал не е само клуб – туку пример како се гради иднината на македонскиот фудбал.
