Во време кога многу клубови во Македонија мака мачат со условите за тренинг и натпревари, едно мало село во битолскиот регион покажува дека со љубов, волја и труд може да се постигне многу повеќе од очекуваното.
Фудбалскиот клуб Напредок од Ношпал, дебитант во Трета лига – Југозапад, располага со терен кој едноставно фасцинира. Тревникот е во перфектна состојба, рамен, густ и одлично одржуван – на ниво што може да му позавидат не само второлигашки, туку и прволигашки клубови.
Она што овој подвиг го прави уште повпечатлив е фактот дека целиот терен е одржуван со сопствени средства и труд на управата на клубот, без било каква друга помош. Играчите и членовите на управата со посветеност го косат теренот со рачни косачки за двор, што е вистински пример за спортска љубов и ентузијазам.
Во време кога често слушаме за лоши терени и слаба инфраструктура, Напредок Ношпал е вистински доказ дека фудбалот може да цвета и во најмалите средини – кога постои страст и посветеност.
Селото Ношпал се наоѓа во општина Могила, на околу 25 километри од Битола, и брои нешто помалку од 300 жители. Но, нивниот клуб веќе го привлече вниманието на фудбалската јавност – со терен каков што немаат ни многу поголеми и побогати клубови во земјава.
Од Напредок порачаа дека целта е јасна – да се создадат идеални услови за младите играчи од регионот и фудбалот повторно да стане гордост на малите села во Македонија.
