ТФТ блесна во Никшиќ и направи „брејк“ за чекор до финале во АБА 2

Кошаркарите на ТФТ се на чекор до историски пласман во финалето на АБА 2 лигата, откако со одлична игра славеа на гостувањето кај Сутјеска во Никшиќ и поведоа со 1-0 во полуфиналната серија.

Тимот од Тафталиџе одигра фантастично прво полувреме во кое постигна дури 59 поени и создаде висока предност од 59-41, што се покажа како клучно за конечниот триумф. Во продолжението домаќинот се обиде да се врати, но гостите сигурно ја контролираа ситуацијата и не дозволија пресврт.

Лидер на ТФТ беше Виктор Ташовски со 28 поени, на кои додаде шест асистенции и три скока. Одлична поддршка имаше од Дејвис, кој запиша 14 поени, девет скока и девет асистенции, како и Гордон со „дабл-дабл“ од 14 поени и 12 скока. Двоцифрен ефект имаа и Говенс со 12, како и Стојаноски со 10 поени и шест скока.

Со овој триумф ТФТ направи голем чекор кон финалето и сега има две меч-топки за пласман во завршната серија. Втората средба се игра на 15 април во Скопје, каде македонскиот претставник ќе има шанса пред својата публика да ја завери визата за големото финале.