Голманот на Шкендија Арачиново, Антонио Столевски, се наоѓа во фантастична форма и е еден од најзаслужните за одличните резултати на својот тим во Втората лига.
23-годишниот чувар на мрежата запиша импресивна серија од пет натпревари без примен гол, потврдувајќи ја својата класа и стабилност меѓу стативите. Столевски ја сочува мрежата на дуелите против Големо Коњари (0-4), Детонит Плачковица (1-0), Слога Виница (0-5), Беласица (0-0) и Тетекс (2-0).
Столевски пристигна во Арачиново во текот на зимскиот преоден рок од Слога Виница, а неговото доаѓање веднаш донесе сигурност во последната линија. Токму тоа што беше најавувано од Спортска Мрежа – дека ќе внесе стабилност на голот – сега се потврдува и на теренот.
Во прилог на одличната форма на голманот оди и фактот дека Шкендија Арачиново, заедно со ГФК Охрид Лихнидос, ја има најдобрата одбрана во лигата со само 12 примени голови на 23 натпревари.
Инаку, младиот прилепчанец зад себе има богато искуство, настапувајќи за Победа, каде беше еден од клучните играчи во обезбедувањето опстанок преку бараж, како и за Кожуф, Караорман, Велешта и Брегалница, додека фудбалските почетоци ги има во школата на Перак.
Со ваква форма на Столевски и стабилна одбрана, Шкендија Арачиново сериозно конкурира за пласман во Првата македонска фудбалска лига, откако минатата сезона го освои првото место во Третата лига – Север и избори пласман во второлигашкото друштво.
