Охрид продолжува да ја пишува својата европска приказна со пласманот во полуфиналето на Купот на ЕХФ, по победата над Олимпијакос во два одлични натпревари.
Голманот на охриѓани, Кристијан Пилиповиќ, во изјава за Спортска Мрежа, нагласи дека клучот за успехот во двомечот била волјата и единството на тимот, како и напорната подготовка и професионалниот пристап на играчите. Тој потенцираше дека охридскиот состав, со голема поддршка од домашниот терен и навивачите, успеал да го потврди квалитетот и да покаже дека е подобар од Олимпијакос. Пилиповиќ блескаше на голот, со одбрани кои значително го помогнаа тимот во клучните моменти.
„Јас мислам дека во овој двомеч одлучи волјата, и тоа што сме навистина многу здрава екипа- момците се навистина сјајни, вистински професионалци. Работевме доста долго за овој двомеч, се подготвувавме со денови и ете, на крај тој труд исплива на површина и даде позитивен резултат. Секако, кога победивме во Атина со пет позитива, видовме дека можеме, а сега знаевме и дека ќе имаме поддршка дома- наш терен и навивачи, што ни беше и одговорност и притисок..иако имавме плус пет, сепак ова е ракомет и како што видовме и вечерва на крај водеа и со еден гол..Но сепак, многу сум среќен што и по вторпат покажавме дека сме подобри од Олимпијакос, и сметам дека сосема заслужено сме тука.”- изјави Пилиповиќ за Спортска Мрежа.
Пилиповиќ со својата стабилност и блескави одбрани, заедно со единството на тимот, беа клучот за историскиот пласман на Охрид во полуфиналето, потврдувајќи дека оваа генерација е подготвена да се носи со најдобрите во Европа.
