Фудбалскиот клуб Беласица во недела ќе му оддаде посебно признание на Благој Митев, една од најзначајните личности во историјата на струмичкиот клуб и македонскиот фудбал. Пред почетокот на градското дерби против Брера, Митев ќе добие плакета и врамен дрес како знак на благодарност за сè што направил за Беласица низ годините.
Свеченоста ќе се одржи пред дуелот меѓу Брера и Беласица, кој е закажан за недела од 18 часот, во рамките на 8. коло од Втората македонска фудбалска лига. Од клубот упатија повик до целата фудбалска јавност и навивачите во што поголем број да присуствуваат, да му оддадат почит на Митев и да го поздрават неговото заминување.
Благој Митев својата фудбалска кариера ја започнал на само 14 години во младинската школа на Победа од Прилеп. Со прилепскиот клуб настапувал и неколку сезони во Втората југословенска лига – Исток, а во летото 1978 година пристигнал во Беласица, каде што ги поминал најубавите години од својата играчка кариера.
Митев со години важел за еден од најдобрите леви бекови во Првата македонска лига. Во 1983 година со Беласица ја освоил титулата шампион на Македонија, а со струмичкиот клуб настапувал и четири сезони во Втората југословенска лига – Исток. Во деветте сезони поминати во дресот на Беласица одиграл 186 првенствени натпревари и постигнал осум голови. Според бројот на настапи, се наоѓа меѓу 25-те фудбалери со најмногу одиграни натпревари во историјата на клубот.
Во летото 1987 година се преселил во Победа од Валандово, каде што настапувал три сезони. Митев во сениорскиот фудбал поминал вкупно 17 сезони, а играчката кариера ја завршил во јуни 1990 година.
Веднаш потоа започнал ново поглавје во својата кариера – тренерското. Од јули 1990 година почнал да работи како тренер, првично во Беласица, а подоцна долги години бил дел од Турново, со кое остварил значајни успеси. Во еден период работел и во Младост од Сушица, клуб кој тогаш се натпреварувал во Втората македонска лига.
Во сезоната 1997/98, заедно со Ратко Јанушев, ја предводел Беласица во Првата македонска лига. Во 2016 година повторно се вратил во клубот, по третпат во својата кариера, и следните десет години бил дел од стручниот штаб на струмичкиот тим. Како тренер, Митев поминал 36 сезони во сениорскиот фудбал, од кои 13 биле во стручниот штаб на Беласица.
Кога ќе се соберат играчките и тренерските години, Благој Митев има повеќе од пет децении посветени на сениорскиот фудбал. Неговото значење, сепак, не се мери само преку бројките, натпреварите и успесите.
Струмичани го паметат пред сè како исклучително добар човек, човек со коректен однос кон соиграчите и фер-плеј пристап кон противниците. Во текот на годините бил ментор на многу генерации фудбалери, оставајќи белег и како играч и како тренер.
Неделната церемонија пред градското дерби ќе биде можност Беласица и фудбалската јавност да му се заблагодарат за долгогодишната посветеност и придонесот во развојот на клубот. Во пресрет на дуелот со Брера, фудбалот во Струмица ќе биде во знакот на човекот кој најголемиот дел од својата спортска приказна го испиша во сино-белиот дрес.
