Во големото финале од футсал Купот на Македонија ќе се сретнат екипите на Проект и Кеги Моби, во дуел кој ветува вистински спектакл.
Тимот на Проект влегува како апсолутен фаворит – единствен непоразен состав во македонскиот футсал оваа сезона, во сите конкуренции. Клубот од Јосифово веќе ја обезбеди шампионската титула, а сега има јасна цел – да ја освои и Куп-титулата и да ја заокружи сезоната со „двојна круна“.
Доминирајќи во текот на целата сезона, Проект делува моќно и сигурно, со офанзива која буквално ги „решета“ противничките мрежи. Иако работата во првенството е завршена, амбицијата е јасна – да се остане перфектен и во преостанатите три кола, без ниту еден пораз.
Во полуфиналето, Проект без никакви проблеми го декласираше Клими со убедливи 11:0, во натпревар кој помина без вистинска неизвесност и само ја потврди нивната супериорност.
Од другата страна, Кеги Моби до финалето стигна по многу потежок пат. Велешани мораа да се борат до последен момент и преку пенали го елиминираа Јувентус Серава, покажувајќи карактер и смиреност во клучните моменти.
Токму затоа, финалето ќе биде судир на два различни патишта – доминантниот и перфектен Проект против мотивираниот и борбен Кеги Моби, кој ќе се обиде да го сопре шампионот.
Во наредниот период ќе биде познато и каде, како и кога ќе се одигра финалниот натпревар од футсал Купот на Македонија.
