Стадионот „Билјанини Извори“ во Охрид добива нов лик, откако започна изградбата на нова трибина која значително ќе ги подобри условите во овој спортско-рекреативен комплекс во нашиот најголем туристички центар во Македонија.
По уривањето на старата монтажна трибина, на истата локација веќе се поставени темелите, а градежните активности се во полн ек. Работите напредуваат според планот, а објектот полека го добива својот конечен облик.
Камерата на Спортска Мрежа го забележа текот на изградбата, а во видеото може да се види и како ќе изгледа новата трибина по нејзиното завршување.
Според нашите информации, по комплетирањето на главната трибина, планирано е поставување и на дополнителни монтажни трибини зад головите, како и инсталирање на рефлектори, што ќе овозможи одигрување на натпревари и во вечерни термини.
Со оглед на тоа што во рамки на СРЦ „Билјанини Извори“ веќе постојат терени со природна и вештачка трева, како и непосредната близина на спортската сала, тениските и кошаркарските терени, овој комплекс претставува сериозен чекор напред кон развој на спортско-туристичкиот потенцијал на Охрид.
