Ракометниот клуб Прилеп прави важен чекор кон стабилност и континуитет, откако официјално ја продолжи соработката со тренерот Наум Танески и двајца од клучните ракометари – Димитар Димитриоски и Никола Шипинкоски.
Стружанецот Танески и во наредната сезона ќе го предводи тимот од клупата, додека најдобриот стрелец Димитриоски останува да биде главна офанзивна опција на прилепчани. Во составот ќе продолжи и десниот бек Шипинкоски, кој се приклучи на тимот од Охрид во текот на сезоната и брзо се наметна како значаен дел од ростерот.
Со овие потези, Прилеп го задржува костурот на тимот и испраќа јасна порака дека амбициите за следната сезона се повисоки. Иако оваа сезона настапува во плеј-аут фазата од Суперлигата, клубот веќе ги поставува темелите за посилен резултат и евентуална борба за плеј-оф позициите за следна сезона.
Од клубот потврдија дека договорите се официјално продолжени, со желба новата сезона да донесе многу повеќе победи и успех за прилепскиот ракомет.
