Ракометарите на ГРК Охрид се на чекор до ново историско поглавје на европска сцена, откако во првиот четвртфинален дуел во Атина го совладаа Олимпијакос со 31-26. Пред „гладијаторите“ остануваат уште 60 минути во салата „Билјанини извори“ за да го заверaт пласманот меѓу најдобрите четири во ЕХФ Европскиот куп.
Охрид одигра зрело и сигурно во Грција, контролирајќи го натпреварот од самиот почеток. Предноста постојано беше на страната на македонскиот тим, а во еден момент достигна и „плус шест“ (14-8), со што јасно стави до знаење кој го диктира ритамот.
И покрај тоа што Савас беше најефикасен кај домаќините со 14 погодоци, одбраната на охриѓани успеа да ги неутрализира останатите закани, што се покажа како клучно во контролата на резултатот.
На голот блескаше Кристијан Пилиповиќ со дури 18 одбрани, додека во нападот се истакна Николаос Лиапис со осум погодоци, како едно од пријатните изненадувања. Свој придонес дадоа и Иванковиќ, Срмљан и Прибетиќ, кои ја одржуваа стабилноста во клучните моменти.
Сега сцената се сели во Охрид, каде се очекува полна сала и силна поддршка од трибините. Тимот на Борис Ројевиќ има солидна предност, но како што најави Лиапис – сè уште ништо не е завршено.
,, Многу сме среќни за победата, но ништо не е завршено. Ќе тренираме и ќе се подготвуваме за следниот натпревар против Олимпијакос. Верувам во мојот тим дека ќе бидеме уште подобри во вториот натпревар и дека со помош на нашите фанови ќе славиме заедно!”- изјави Лиапис.
Олимпијакос ќе се обиде да возврати и да ја анулира негативата, но охриѓани имаат јасна цел – да ја довршат работата и да испишат историја.
Со предност од пет гола и домашен терен, Охрид е во идеална позиција, но ќе мора да остане максимално фокусиран. Европската пролет е на дофат – останува уште еден чекор до полуфинале.
