Фудбалскиот клуб ФК Дојранско Езеро добива нова енергија и сериозна организациска структура, откако беше формирана нова управа составена од луѓе кои искрено го сакаат фудбалот и веќе имаат дадено значаен придонес во спортот.
На чело на клубот како претседател застанува легендарниот Игор Џамбазов – актер, музичар, ТВ-водител и еден од најпрепознатливите јавни личности во Македонија, кој сега ја започнува својата нова спортска приказна, ексклузивно дознава Спортска Мрежа, а за што потврдија и од клубот.
Покрај него, дел од управата се и Мишел Истатов кој е син на Благој Истатов, Кирил Изов кој е селектор на женската фудбалска репрезентација на Македонија и тренер на ЖФК Истатов и Дине Бојаџиев, додека функцијата секретар ќе ја извршува Иле Поп Костов.
Клубот од Нов Дојран, кој моментално се натпреварува во Трета македонска фудбалска лига – Исток, покрај сениорскиот тим располага и со младински категории, што претставува важна основа за развој на идните генерации.
ФК Дојранско Езеро е основан во 1978 година и својот најголем успех го има со настапите во Втора македонска фудбалска лига. Клубот располага со сопствен стадион и одлична спортска инфраструктура, што му дава потенцијал за понатамошен раст.
Особено емотивна димензија на оваа приказна дава поврзаноста со легендарниот Благој Истатов. Клубот имал огромно значење за него, а денес неговото семејство – Истатови, ја продолжуваат традицијата и љубовта кон клубот.
Токму Игор Џамбазов, кој бил близок пријател со Истатов, на меморијалениот турнир во Струмица во чест на Благој Истатов откри интересна анегдота – дека токму Благој Истатов е „виновен“ што ја развил неговата љубов кон фудбалот.
Дополнително, Џамбазов сподели дека во една сезона дури бил и физиотерапевт во клубот од Дојран.
Сега, судбината повторно го враќа во истиот клуб – но овојпат во многу поважна улога.
Со новата управа и со човек како Игор Џамбазов на чело, ФК Дојранско Езеро добива силен импулс и надеж за подобри резултати и враќање на старите успеси.
Дојранчани влегуваат во ново поглавје – со традиција, емоција и големи амбиции.
