Пролетниот дел од сезоната во Првата македонска фудбалска лига носи сериозни поместувања на табелата, а 24 коло потврди дека борбата ќе биде жестока до самиот крај. Победи запишаа Работнички и Тиквеш, секој во своја мисија – опстанок и пробив кон горниот дел од табелата.
Тимот од Дебар Маало продолжува со позитивниот ритам и со триумфот над Силекс (2-0) направи значаен чекор во борбата за опстанок. Двојниот стрелец Јован Попзлатанов беше клучна фигура во натпреварот, носејќи му на својот тим нови три бода. Со оваа победа, Работнички стигна до 22 бода и се израмни со Пелистер на делба на десеттата позиција.
Иако ситуацијата останува тешка, „романтичарите“ сега имаат само шест бодови негатива од сигурната зона за опстанок. Во следното коло ги очекува нов сериозен предизвик – гостување кај Струга Трим Лум.
Од друга страна, Силекс ја продолжи резултатската криза и останува на четвртото место со 40 бодови, но загрижува фактот што тимот нема постигнато гол на четири натпревари по ред.
Во Кавадарци, Тиквеш демонстрираше моќ и ја декласира Брера Струмица со убедливи 6-1. Со овој триумф, Тиквеш стигна до 36 бодови и се приближи на само четири бода до четвртопласираниот Силекс, со што борбата за повисок пласман дополнително се вжештува.
Брера, пак, останува на седмата позиција со 28 бодови, но може да почувствува притисок од Арсими, кој има два бода помалку и свој натпревар во ова коло.
Мечот во Кавадарци го одбележа голот со ножички на Марјан Стојанов кој беше двоен стрелец, а по еден гол постигнаа Данаил Тасев, кој го запиша 100-тиот меч во дресот на тимот од Кавадарци, стрелци беа и Кристијан Стојкоски и Благој Стојчев. За гостите единствен стрелец беше Емрах Макич, а пак Марко Стојилевски си постигна автогол.
Останатите средби од колото носат нови возбудувања. Арсими ќе се соочи со Вардар, додека Македонија ЃП ќе игра против Шкендија. В недела, Пелистер ќе има императив за победа против Струга Трим Лум во битката за опстанок, додека Башкими ќе важи за фаворит против Шкупи.
До крајот на сезоната остануваат уште неколку кола, но веќе е јасно – нè очекува драматична завршница и на врвот и на дното на табелата.
