Дерби натпреварот од 22. коло во Втората македонска фудбалска лига меѓу Брегалница и Охрид ќе се одигра под рефлектори на Градскиот стадион во Штип, ексклузивно дознава Спортска Мрежа.
Според нашите информации, натпреварот е закажан за 28 март (сабота) со почеток од 18 часот, што ќе донесе посебен амбиент за едно од најважните соочувања во борбата за пласман во Првата лига.
Брегалница и во есенскиот дел одигра неколку натпревари под рефлектори, но ова ќе биде првиот вечерен меч за штипјани во пролетниот дел од сезоната.
Очекувањата се дека атмосферата ќе биде на високо ниво, со оглед на тоа што станува збор за директен дуел на две екипи кои конкурираат за влез во елитата. Ваквите дерби пресметки, според многумина, заслужуваат да се играат во вечерен термин, со што публиката и навивачите добиваат подобро фудбалско доживување.
Во текот на есенскиот дел од сезоната, покрај Брегалница, и Беласица имаше натпревари кои се играа под рефлектори во рамки на Втората лига, што дополнително го подигнува квалитетот и атрактивноста на натпреварувањето.
