Во Домот на културата „Иван Мазов Климе“ во Кавадарци се одржа традиционалната манифестација за прогласување на најуспешните спортисти за 2025 година, на која беа доделени признанија за најдобрите во повеќе категории.
Настанот се одржа во прекрасна атмосфера и во организација на Сојузот на спортови на Кавадарци, а на истиот присуствуваа претседателот на Советот на Општина Кавадарци, претставници од Министерството за спорт, претставници на спортските клубови од општината, спортисти, тренери и бројни љубители на спортот.
Кавадарци со години важи за расадник на спортски таленти, а локалната самоуправа во изминатиот период, предводена од градоначалникот Митко Јанчев и Советот на општината, континуирано вложува во развојот на спортот преку подобрување на инфраструктурата и поддршка на спортските дисциплини кои бележат напредок.
Спортот, покрај натпреварувачкиот карактер, има и големо значење за здравиот психофизички развој на младите.
На манифестацијата беа доделени признанија за најдобрите во 2025 година.
За најдобар спортски работник беше прогласен Дарко Цеков, додека признанието за најдобар тренер му припадна на Мартин Димитриовски. Наградата за најдобар спортски колектив ја доби Центарот за боречки вештини „Будо“ од Кавадарци, додека за најдобар млад спортист беше избран Никола Петров.
Највисокото признание – спортист на годината за 2025 – и припадна на Данка Стојкова, која со своите резултати го одбележа спортскиот живот во Кавадарци во изминатата година.
Организаторите упатија честитки до сите наградени спортисти, нивните тренери и клубови за постигнатите резултати и за достојното претставување на градот, истакнувајќи дека Кавадарци со гордост ги следи нивните успеси.
