ГРК Охрид утре го очекува уште еден важен предизвик во европската сезона – дуелот од осминафиналето на ЕХФ Купот со чешката Дукла Прага. Целта на охриѓани е пласман меѓу најдобрите осум екипи, но тренерот Борис Ројевиќ е свесен дека патот до таа цел ќе биде тежок.
На прес конференцијата за новинари, која денес се одржа во салата ,, Билјанини Извори”, стратегот на охриѓани, потенцираше дека противникот е искусен и со богата традиција во Европа, а клучна улога за успехот на домашната екипа ќе има и атмосферата во салата:
„На гости ни доаѓа сериозен противник, кој двапати беше шампион на Европа. Дукла е сериозна екипа, со тројца репрезентативци на Чешка и селекторот на репрезентацијата, клуб со голема традиција и ние едвај чекаме натпреварот да започне.”
Исто така, Ројевиќ истакна и колку е важна поддршката од трибините и атмосферата во салата за мотивирање на тимот.
,, Ги повикувам нашите навивачи да ја наполнат салата и да направат атмосфера како против Еурофарм Пелистер, тоа нам многу ќе ни значи. Имавме некои промени во ростерот, формата можеби не ни е на посакуваното ниво, но ние сме спремни за овој предизвик. И пак ќе повторам – ако атмосферата биде како онаа против шампионот, која беше најдобра атмосфера која што сум ја видел во животот – а сум поминал многу, сигурно дека ќе ни биде многу полесно“, изјави српскиот стратег.
На крај, заклучи дека и покрај промените во ростерот, Охрид е спремен за саботниот натпревар и очекува поддршката од трибините да биде клучен фактор за успехот на домашен терен и добар резултат пред реваншот.
Натпреварот ќе се одигра утре во салата „Билјанини Извори“ со почеток од 18:00 часот, а поддршката од трибините се очекува да биде клучна за Охрид да тргне со добар резултат кон реваншот.
