Средниот бек на ГРК Охрид, Тилен Стрмљан, е еден од клучните играчи на Охридската ракометна Тврдина и важен мотор во средината на теренот. Со своето искуство и лидерски квалитети, Стрмљан е подготвен да го води тимот во осминафиналниот дуел од ЕХФ Купот со Дукла Прага.
На денешната прес- конференција за новинари, борбениот словенечки ас нагласи колку им е важна поддршката од навивачите и колку тимот е мотивиран за утрешното соочување.
„Ни доаѓа силна екипа, што се бори за титулата во домашниот шампионат. Ние сме добро подготвени за нив и ќе дадеме 100% од нашите сили. Знаеме дека нема да биде лесно, но одиме на победа, тоа е нашата цел. Посакуваме полна сала и голема поддршка, а ние ќе дадеме сè од себе за на крај сите заедно да се радуваме на победа.“, изјави Стрмљан.
Стрмљан и екипата влегуваат во мечот со одлична атмосфера и самодоверба по двете значајни победи во домашниот шампионат, а неговата упорност и страст кон играта ќе бидат клучни за тоа Охрид да тргне со позитивен резултат пред реваншот.
