Македонскиот тенисер Калин Ивановски загуби на стартот од квалификациите на Челинџер 125 турнирот кој се игра Хелсинки, Финска. Најдобриот македонски тенисер загуби од искусниот Јиржи Весели од Чешка со 2:0 во сетови за 95 минути игра.
Натпреварот започна со водство на Ивановски од 1:0, но во следниот гем на сервис на Калин, тенисерот од Чешка успеа да направи брејк и ја искористи единствената брејк шанса и таа предност и водство ги задржа до крајот на сетот што го доби со 6:4. Во вториот сет, македонскиот тенисер имаше постојано предност, а во осмиот гем од сетот Ивановски ја имаше и единствената брејк топка, но не ја искористи и сетот се решаваше во тај брејк. Ивановски поведе со 2:1 во поени, но Весели со своето искуство беше подобар со 7:3 на поени и 2:0 во сетови.
Овој турнир во Хелсинки се игра за награден фонд од вредни 148.625 евра на тврда подлога во сала.
