Вардар синоќа го загуби македонското „ел класико“ во Битола, откако беше поразен од Пелистер со минимални 1:0 со што ја продлабочи резултатската криза, а со тоа Вардар останува „закован“ на дното со само осум бодови на своето конто.
Веќе утро клубот и тренерот Срѓан Захариевски спогодбено се разделија, па со тоа Вардар ќе го добие дури четвртиот тренер по само 13 кола во Првата лига.
„АД ФК Вардар му благодари за несебичниот ангажман,максималниот вложен труд и голема желба за успех. За личности како Срѓан Захариевски вратите на АД ФК Вардар се секогаш отворени“, стои во соопштението на Вардар објавено на социјалната мрежа „Х“.
Вардар по 13 кола има само две победи, две ремија и дури девет порази, а во следното коло кое се игра в сабота го очекува дерби меч против Шкупи во скопската пресметка.
Вардар сезоната ја започна со Горазд Михаилов, па дојде Горан Петрески, но не се задржа долго, пристигна Срѓан Захариевски, а по него Вардар ќе добие нов тренер.
Повеќе од јасно е дека во Вардар ќе треба поголем ремонт со цел тимот во пролетниот дел да биде многу стабилен и резултатски да се подобри значително, во секој друг случај ќе има жилава борба за опстанок во Прва лига.
