По 11 одиграни кола во Втората македонска фудбалска лига дојде до промена на листата на најдобри стрелци. Никола Талески од Победа е најдобар стрелец со десет погодоци и прв играч кој стигна до двоцифрена бројка на постигнати погодоци.
19-годишникот на последниот меч против Вардарски постигна четири погодоци и со тоа изби на врвот на листата на најдобри стрелци пред Симеон Христов кој сега е втор најдобар стрелец, со тоа што фудбалерот на Македонија ЃП има осум погодоци.
По седум погодоци имаат Дарко Гроздановски од Кожуф и Андреј Симевски од Каменица Саса. Гроздановски на почетокот од првенството ги тресеше мрежите, а сега на последните натпревари нема погодоци и започна да паѓа на листата на најдобри стрелци.
Хусеин Демири е најдобар стрелец на Башкими, кој има постигнато шест погодоци, а со по пет погодоци се Сашо Дуков кој е најдобар стрелец на Охрид, Димче Јовов кој е најдобар стрелец на Беласица, Аљбин Рамадани и Шефит Шефити од Арсими и Меметриза Хамза од Башкими.
Листата на постигнати автоголови се прошири на четири фудбалери. Кристијан Јордановски од Борец, Мартин Димоски од Каменица Саса, Павле Петров од Борец и Лука Трајкоски од Детонит Плачковица се фудбалери кои си постигнале автоголови.
