Ги „прескокна“ претквалификациите за Светскиот Куп, но повторно му стои на располагање на селекторот Марјан Илиевски. Стојан Ѓуроски се приклучи на тренинг на сениорската репрезентација пред почетокот на претквалификациите за Евробаскет 2029, во кои Македонија ќе влезе „побогата“ за едно значајно искуство – неговото присуство.
Искусното крило не го криеше задоволството што повторно е дел од националниот тим:
„Чувството е одлично. Задоволство е и гордост да се претставува Македонија. Не настапив на последните мечеви поради повреда, и убаво е што пак сме заедно. Мислам дека ни следи одлична атмосфера, да ги анализираме противниците и да се спремиме за следните два меча. Уште не сме ги гледале ривалите, но ние одиме на победа без разлика кој е на другата страна. Имаме три дена подготовки, но исто е за сите. Имаме неколку повратници во екипата, сме играле и со Вајли заедно, така што нема да имаме проблем да се воиграме.“
Натпреварот против селекцијата на Азербејџан ќе се одигра на 27 ноември, со почеток во 19:00 часот, во салата на СРЦ „Кале“ во Скопје.
