Вардар ја продолжи победничката серија и со сигурни 0-2 се врати од гостувањето во Струмица, каде во рамки на 14. коло ја совлада екипата на АП Брера. Тимот на Гоце Седлоски повторно ја демонстрира својата стабилност и контрола, запишувајќи ја 11. сезонска победа и останувајќи непоразен во досегашниот тек од првенството.
Тежок и разгазен терен, кал и ограничени услови за комбинациона игра – но тоа не го спречи вардарци да наметнат притисок и темпо. Иако првото полувреме не донесе промена на резултатот, црвено-црните имаа неколку ветувачки ситуации. Најблиску до гол беше Едиз Спахиу, кој во завршницата на првиот дел не успеа да искористи одлично нафрлување од десната страна.
По паузата, Вардар ја засили офанзивата и тоа веднаш даде резултат. Во 53. минута, по убава акција низ казнетиот простор, Михаил Талевски успеа да ја спроведе топката во мрежата и да донесе водство. Голот беше проверуван неколку моменти поради сомнеж за офсајд, но на крајот беше правилно признат.
Печат на триумфот стави Димитар Тодоровски во 71. минута, кога пресече лошо додавање во домашниот шеснаесетник и рутински погоди за 0-2. Вардар имаше уште една желзена шанса преку Јанкулов, но стрелецот не беше прецизен за трет гол.
Со оваа победа, Вардар се зацврстува на врвот со 36 освоени бодови. Зад него е Струга Трим Лум со 32 и натпревар помалку, додека Шкендија ја следи трката со 30 бодови.
Црвено-црните уверливо чекорат кон зацврстување на првото место, а нивниот низ од стабилни игри покажува дека амбициите за највисок пласман се сосема реални.
