Ракометарите на Вардар 1961 запишаа значајна победа во Европската лига откако во СЦ „Јане Сандански“ го совладаа Кристијанштад со 35-30. Со овој триумф „црвено-црните“ му вратија за гостинскиот пораз и повторно се искачија на врвот на табелата во својата група.
Дуелот започна нервозно и со многу непрецизни напади на двете страни. Вардарци не ги користеа првите контри, а Швеѓаните први дојдоа до водство преку Кавада од седум метри. Сепак, домаќините брзо се стабилизираа – Малус, Ќосевски и Тузолана ја вратија рамнотежата, а потоа блескаше голманот Валах, кој со неколку врзани интервенции иницираше серија од три гола и предност од 7-5. Разликата постепено се градела и по погодоците на Кавада и Малус, вардарци стигнаа до 10-7.
Во оваа фаза од мечот најрасположен кај Вардар беше Хориха, кој со три прецизни завршници ја одржуваше контролата на теренот. Но Кристијанштад не дозволи поголемо одлепување и со одличните завршници на Мансон и Биел Нилсен успеа да ја стопи предноста. Иако Вардар имаше две можности да замине на +2 пред полувреме, Митровиќ и Хориха не реализираа, па на одмор се замина со тесна предност – 17-16.
Вториот дел почна со доминација на голманите. И Валах и Ал-Хафаџи беа во свој ритам, а домаќините пропуштија два напади од пивот позиција. Гостите преку седмерец стигнаа до 20-19, но Митровиќ го скрши ритамот со важен погодок. Сепак, следуваа две грешки и нереализиран зицер на Тузолана, по што шведскиот состав израмни на 22-22.
Клучниот момент дојде во средината на второто полувреме. Малус и Боно ја искористија брзината во транзиција и донесоа ново водство, а по исклучувањето кај гостите Вардар максимално ја наплати бројчаната предност. Хориха и Тузолана погодија за 26-22, а веднаш потоа Јанковски реализираше на празна мрежа за највисоки пет разлика.
Кристијанштад се обиде да се врати со мини-серија, но секое нивно приближување го гаснеше Хориха со прецизни решенија во клучни моменти. Гостите дури реализираа и атрактивен „цепелин“, но тоа беше недоволно за пресврт во Скопје.
Најрасположен кај Вардар беше фантастичниот Дмитро Хориха со девет гола. Малус заврши со седум, а Милош Валах повторно беше столб на одбраната со 15 убедливи интервенции. За Кристијанштад најдобри беа Мансон со девет и Нилсен со осум погодоци.
