ГРК Охрид доби ново засилување во средниот ред – искусниот српски ракометар Младен Крсманчиќ од денес е дел од тимот на „гладијаторите“. Тој ќе го носи охридскиот дрес во наредниот период и ќе биде значајно оружје во борбата за домашната и европската сцена.
Крсманчиќ има 33 години и игра на позицијата среден бек, со висина од 184 сантиметри. Во својата богата кариера настапувал за клубови во Србија, Унгарија и Шпанија, меѓу кои Југовиќ, Слога, Железничар, Анаитасуна, Чургу, а македонската публика добро го познава по неговите одлични настапи за РК Вардар 1961 во изминатата сезона.
Покрај клупската кариера, Крсманчиќ има и настапи за сите младински категории и сениорската репрезентација на Србија, каде оставил значајна трага со своето искуство и лидерство на теренот.
„Драго ми е што станав дел од РК Охрид во моментот кога амбициите на клубот растат. Многу ми се допаѓа визијата на клубот и ќе дадам се од себе да ја оправдам довербата која ми е пружена. Се надевам во наредниот период РК Охрид ќе испише историски успеси и во домашното првенство и на европската сцена како би ги израдувале нашите навивачи,“ изјави новиот среден бек на охриѓани.
Со ова засилување, ГРК Охрид добива искусен и проверен ракометар кој ќе донесе стабилност и креативност во нападот. Тимот на Борис Ројевиќ продолжува да го зајакнува составот со цел да ја продолжи успешната серија и да ја подигне конкурентноста на уште повисоко ниво.
