Македонскиот борач Омер Мемеди направи голем успех на Балканското првенство за младинци (У20), кое се одржа во Романија, освојувајќи златен медал и со тоа станувајќи балкански шампион во категоријата до 92 килограми. Мемеди со извонредни настапи и голема борбеност ги совлада сите противници на својот пат до финалето, каде уште еднаш ја покажа својата доминација и заслужено го освои најсјајното одличје.
Овој успех претставува голем поттик не само за него, туку и за македонското борење воопшто, кое последните години бележи сè поголем напредок и резултати на меѓународната сцена.
Покрај Мемеди, во женска конкуренција нашата Мелани Митевска исто така се истакна со одлични настапи на шампионатот. Таа по четири тешки борби успеа да стигне до бронзен медал, со што ја заокружи успешната македонска приказна во Романија.
И двајцата млади борачи уште еднаш потврдија дека Македонија располага со талентирана генерација која ветува светла иднина за овој спорт. Настапот на нашите натпреварувачи на Балканското првенство е уште еден доказ дека вложувањето во младите спортисти носи резултати и дека македонското борење е на вистинскиот пат.
