Рамадани херој на Фортуна, Еуромилк ГЛ ништо не го запира, три бода за Куманово!

Вистинска голеада беше шестото коло во Трета лига – Север, погодоци од меч во меч се повеќе и повеќе, а денес најмалку имаше на мечот меѓу Студеничани и Фортуна, откако гостинот со голот на Шуајб Рамани славеше со минимални 0:1.

Кадино се покажа лесен залак за Пчиња, откако славеше со убедливи 8:0, а некогашниот второлигаш никако да излезе од резултатската криза.

Хет-трик постигна Димитар Стојановски, двапати погоди Бобан Стојановски, а по еден гол имаа Александар Божинов, Христијан Стојчевски и Јованчо Цаневски.

БВК Коњаре со 3:1 забележа важен триумф над одличниот Аеродром, во меч каде за домаќинот двапати погоди Муадх Куртиш за водство од 2:0, а во 36. минута Стефан Богдановски намали на 2:1. Во вториот дел Руфат Чалафи стрелаше во 81. минута за конечни 3:1.

Беса Сарај на домашен терен забележа пораз од тимот на Ржаничино – исходот беше 2:3. Во првиот дел паднаа четири погодоци, а гостинот имаше рано водство од два погодоци преку Стефан Ѓорѓиев и Халил Калач по девет минути игра.

Брзо реагираше домаќинот и на полувреме дојде до 2:2 преку Зирап Имери и Летурим Таири. Во вториот дел борба од двете екипи за гол и три бодови, а Петре Тасевски во 86. минута беше прецизен за конечни 2:3 со што трите бодови заминаа кај гостинот.

Во 90. минута Венхар Незири доби втор жолт картон и беше исклучен од игра.

Еуромилк ГЛ продолжува да ги декласира своите противници, а денес тимот од Горно Лисиче со 6:1 го доби Лопате.

Михаило Митров го отвори резултатот, а пак Шенур Незири си постигна автогол за 2:0 на полувреме. Во вториот дел Орхан Мифтар, Јовица Радевски и Ахмед Бакијов зголемија на 5:0, а пак Ринор Исени намали на 5:1.

Во 68. минута конечните 6:1 ги постави Томче Павловски, со што некогашниот прволигаш продолжува да ги полни мрежите на противниците на патот кон баражот за Втора лига.

Трите бодови останаа во Слупчане откако Беса со 5:3 го доби Башкими Љуботен, каде за домаќинот погоди Шуајб Барајми за отварање на резултатот, а двојни стрелци беа Фатим Бајрами и Бехар Демири. За гостинот во првиот дел погодија Харис Исљами и Зибер Ајдари, а во вториот дел погоди Фаредин Исени.

Куманово однесе висока победа над Отља, но се решаваше во финишот од мечот. По една минута игра Гезим Бакиевски погоди за 1:0.

Отља бараше начин за израмнување, а Куманово преку Кристијан Златковски кој погоди двапати во 72. и 77. минута дојде до високи 3:0, а во 85. минута Бехар Реџепи ги постави конечните 4:0.

Главниот судија Фуркан Фетаху кај домашните додели еден жолт картон, а кај гостинот пет жолти, а пак во стручниот штаб на Шемси Незири му додели два жолти картони и во 70. минута го напушти теренот.