Бошеска херој на Тиверија Брера, Скопје го доби дербито со Саса, Истатов и Љуботен со високи победи!

Скопје триумфираше во дербито со Каменица Саса славејќи со 0:2, а благодарение на двата погодоци на Блехана Алиеска, која го реши мечот во Македонска Каменица, во дерби од 9. коло на Првата женска фудбалска лига.

Алиеска првиот погодок го постигна од тешка позиција во 23. минута за водство на гостинот од 0:1 на полувреме. Во вториот дел „рударките“ бараа создавање на ситуација за погодок, но одново Алиеска во 66. минута ја стресе мрежата на Симона Тринкова за конечни 0:2.

Тиверија Брера го слави името на Ане Бошеска која го реши дербито во Струга со гол во 66. минута со што гостинот од Струмица го освои целиот плен славејќи со 1:2 над Ас Јунајтед.

Возбудлив и неизвесен меч понудија двете екипи во градот покрај Охридското Езеро. Павлинка Николовска во 12. минута го отвори резултатот, но радоста на Тиверија Брера траеше само четири минути, откако новото засилување Јована Павлоска во 16. минута беше прецизна за 1:1.

Во вториот дел двете екипи беа во резултатска егал барајќи погодок за три бодови, а човек на одлука беше искусната Бошеска откако македонската репрезентативка во 66. минута ја матираше бразилската голманка Џесика Тајнара Алвеш де са Сантос за конечни 1:2 за огромна радост за Тиверија Брера.

Истатов апсолутно без никаков проблем го совлада тимот на Речица со резултат од 3:0 на домашен терен. Девојките на Кирил Изов одиграа одличен натпревар и сосема очекува стигнаа до трите бодови.

Радица Чонева во 38. минута од средбата постигна гол за водство на домаќинот од 1:0 на полувреме. Во второто полувреме Кристина Петрушевска постигна погодок за двојна предност на домаќинот, а веќе во 62. минута резултатот беше 3:0 откако стрелаше Катерина Петкова за висока и убедлива победа.

Кочани го слави името на Ангела Стојковска која со два погодоци во 30. и 45. минута го реши натпреварот со Топ Гол, со што тимот од Битола беше поразен со 2:1.

Во 73. минута Ивана Милевска погоди за конечни 2:1 и ублажување на поразот за битолскиот тим.

Овие три бодови се повеќе од важни за Кочани бидејќи практично ова беше дерби од дното на табелата за опстанок во елитата.

Без проблеми шампионот Љуботен славеше со 0:3 на гостувањето кај дебитантот Вардар. Ангелина Јованоска погоди во финишот на првиот дел за 0:1 на полувреме.

Во вториот дел Хава Мустафа во 59. минута ја дуплираше предноста за тимот од Тетово, а во самиот финиш во 86. минута Јулија Живиќ ги постави конечните 0:3.