Ракометарите на Тиквеш ја запишаа својата втора овосезонска победа во Суперлигата, и тоа повторно на гостински терен. Кавадарчани со сигурна игра славеа против Еурофарм Пелистер 2 со 17:23 (8-13) и на најдобар можен начин се вратија на победничките патеки.
Младите битолчани мотивирано го отворија натпреварот и поведоа со 4-2, но следуваше експресна серија на гостите од четири погодоци, со која Тиквеш направи пресврт и повеќе не ја испушти предноста до крајот.
Иако Еурофарм Пелистер 2 успеа да се доближи на три гола разлика (12-15), неискуството и ограничениот ростер по отсуството на Французинот Одифред Баптист си го направија своето. Тиквеш со цврста одбрана и дисциплиниран напад ја контролираше играта до последниот свиреж, стигнувајќи до заслужен триумф во еден тежок натпревар под Битола.
Најефикасни поединци беа Димитар Коцев кај Тиквеш и Ненад Белистојаноски кај битолчани – двајцата со по четири погодоци.
Во следното коло, Еурофарм Пелистер 2 гостува кај Пролет во Скопје, додека Тиквеш ќе има нов предизвик на домашен терен – против Еурофарм Пелистер.
