Фудбалскиот прволигаш Тиквеш од Кавадарци повторно се врати под капата на Општина Кавадарци, откако турскиот спонзор не ги исполни обврските кон клубот. Со тоа, градоначалникот Митко Јанчев ја презеде иницијативата за финансиска стабилизација и започна процес на консолидација.
Играчите денес ги добија заостанатите плати, а од клубот порачаа дека исплатата е дополнителен мотив за позитивен резултат на претстојниот меч со Силекс во Кратово.
„ГФК Тиквеш е консолидиран! Денешната исплатена плата е мотив за следната победа во Кратово“, стои во клупското соопштение.
Градоначалникот Јанчев, пак, потврди дека паралелно со финансиското стабилизирање се работи и на подобрување на инфраструктурата.
„Во тек е реконструкција на теренот на градскиот стадион Тиквеш. Нашите фудбалери заслужуваат најдобри услови за тренинг и натпревари“, изјави тој.
Кавадарчани во новата сезона стартуваа со амбиции и составија конкурентен тим, но во првите осум кола освоија само осум бодови. Со консолидацијата и враќањето на стабилноста, во клубот веруваат дека резултатите ќе тргнат во позитивна насока.
