Големото дерби од 7. коло во Втората лига меѓу Беласица и Шкендија Арачиново ќе се игра во недела (05.10.2025) со почеток од 18:30 часот под рефлекторите на стадионот во Струмица.
Беласица, која сезонава сите домашни натпревари ги игра во вечерен термин и е единствениот второлигаш со домашни натпревари под рефлектори, ги покани своите навивачи, симпатизери и љубители на фудбалот од регионот да дојдат и да го поддржат тимот во борбата за нови бодови. Цената на влезницата е симболични 100 денари.
Ова ќе биде дуел на врвот – Беласица го дели првото место со Брегалница со по 16 бодови, додека Шкендија Арачиново е третопласирана со 14 бодови и важи за најпријатното изненадување во лигата.
Струмичани влегуваат во натпреварот со скор од пет победи и едно реми (15:5 гол-разлика), додека тимот од Арачиново досега има четири победи и две ремија (13:4 гол-разлика). Беласица има јасно изразени амбиции за влез во Првата лига, а Шкендија Арачиново со досегашните резултати најавува дека ќе биде сериозен конкурент на врвот.
