Големи вести за љубителите на ракометот во Куманово! По повеќегодишно отсуство, ракометниот клуб Куманово своите натпревари повторно ќе ги игра во легендарната Спортска сала Куманово, која неодамна доби целосно реновиран и модерен изглед.
Салата, изградена во 1980 година и со капацитет од 4.150 гледачи, е вистински храм на спортот во градот. Токму тука, тогашниот Шевро Куманово го освои првиот ракометен Куп трофеј на Македонија по осамостојувањето, што ја прави оваа арена место со посебно значење за кумановскиот спорт.
Новата сезона во машката Супер лига започнува во сабота, кога Куманово ќе го пречека РК Радовиш на домашен терен. Натпреварот ќе се игра со почеток од 19:00 часот, а влезот за сите љубители на спортот е слободен.
„Цела сезона ќе играме во реновираната сала, што ќе биде дополнителен мотив за ракометарите. Ве повикуваме да дојдете и да бидете нашиот плус играч на теренот за да започнеме со победа“, истакнаа од клубот.
Со подобрени услови, модернизација и поголем капацитет за публиката, Куманово оваа сезона очекува вистинска спортска фешта и максимална поддршка од домашните трибини.
