Фудбалската репрезентација на Македонија одигра пријателски натпревар против Саудиска Арабија во Прага и беше поразена со 1:2.
Нашиот национален тим поведе во 40. минута со атрактивен гол со ножички на Александар Трајковски, но противникот израмни уште пред полувремето преку Ал Брикан. Победничкиот погодок за Саудиска Арабија го постигна Абдулах Ал Хамдан во 78. минута.
По натпреварот, селекторот Благоја Милевски изјави:
„Има многу моменти од кои сум задоволен, особено затоа што експериментиравме со составот. Добивме уште двајца играчи кои ќе ја засилат конкуренцијата во тимот. Веќе нагласив дека натпреварот со Лихтенштајн е од големо значење за нас, а сè останато служи како подготовка. Одигравме квалитетен меч против силен противник и навистина ми е задоволство што работам со вакви фудбалери. Сите се адаптираат на новата формација и задачите. Против Лихтенштајн ќе бидеме максимално мотивирани, како што сме на секој натпревар“.
Македонија следниот меч ќе го одигра во недела од 18 часот на Арената „Тодор Проески“ во Скопје против Лихтенштајн, во рамки на петтото коло од квалификациите за Светското првенство.
