Македонската тенисерка Лина Ѓорческа, трет носител на турнирот, обезбеди пласман во полуфиналето на ИТФ W50 турнирот во Слобозија, Романија, кој се игра за награден фонд од 40.000 долари.
Во денешниот четвртфинален дуел, Ѓорческа ја совлада Хрватката Луција Ќириќ – Багариќ со 2-1 во сетови, по 100 минути игра. Иако ривалката го освои првиот сет убедливо со 6:1, Лина одигра извонредно во продолжението, препуштајќи ѝ само еден гем во наредните два сета.
Хрватската тенисерка поведе со 4:0 во првиот сет и го доби со 6:1, но македонската тенисерка веднаш возврати. Во вториот сет Ѓорческа поведе со 2:0, ривалката намали на 2:1, по што следеше серија од четири гема за 6:1 и израмнување во сетови. Решавачкиот трет сет Лина го одигра перфектно – без загубен гем за конечни 6:0 и пласман во полуфиналето.
Со оваа победа, Ѓорческа ѝ се реваншираше на Ќириќ – Багариќ за поразот во финалето во Ларнака минатата година.
Во полуфиналето, Лина ќе се сретне со домашната тенисерка Марија Попа, која исто така со пресврт славеше против Дарија Лодикова со 2-1 во сетови (1:6, 7:5, 6:2).
