Фудбалскиот клуб Куманово на 16 август ги започна подготовките за новата сезона во Трета лига – Север. Веќе следниот ден, кумановци го одиграа првиот контролен натпревар против екипата на ФК Превалец во Велес и славеа со убедливи 6:3, иако резултатот беше во втор план.
Наредниот пријателски меч е закажан за недела, 24 август, на домашен терен против ФК Лопате, со почеток во 17:00 часот на игралиштето во Доброшане.
Клубот задржа поголем дел од ростерот од минатата сезона и донесе неколку засилувања од редовите на кумановски фудбалери. Голема предност за тимот е фактот што тренерот Тони Раденковиќ ќе продолжи да ја предводи екипата и во новата сезона. Тој одлично го познава тимот и успеа да направи вистински спој на младост и искуство, што ќе биде клучно во борбата за врвот на табелата.
ФК Куманово најавува амбициозна сезона и апелира до сите љубители на фудбалот од регионот да дадат поддршка.
