Младиот македонски тенисер Марко Алексовски со убедлив старт го отвори настапот на турнирот во Шпанија за играчи до 14 години од категорија 1. На турнирот во Барселона, Алексовски во првото коло славеше со 2-0 во сетови (6-1, 6-0) против израелскиот претставник Бен Висел.
Во следната рунда, тој ќе се соочи со победникот од дуелот меѓу домашниот тенисер Алваро Мартин и Словакот Мартин Адамца.
За Алексовски ова е трет турнир по ред во рамки на неговата европска турнеја. Минатата недела тој го заврши настапот како полуфиналист на турнирот во Белгија, а по Барселона го очекува уште еден турнир од категорија 1 во Шпанија.
Алексовски е дел од тимот на ITF–Tennis Europe, проект поддржан и финансиран од Grand Slam Development Fund, чија цел е развој на млади талентирани тенисери.
