Битолското село Црнобуки од 8 до 10 август ќе биде домаќин на шестото издание на традиционалниот фудбалски турнир за млади категории – „Трофеј Трајан Куља“, кој оваа година ветува највисок квалитет досега.
Овој турнир веќе стекна голем углед меѓу младинските школи во регионот, благодарение на единствениот концепт – учество без партиципација, со што се овозможува вистински спортски дух и фер можности за сите екипи.
На програмата се натпревари во три возрасни категории – генерациите до 9, 10 и 11 години, со учество на вкупно 48 екипи. Покрај водечките младински школи од Македонија како Пелистер, Вардар, Македонија ЃП и Брера Струмица, ќе настапат и гости од Србија, Босна и Херцеговина и Црна Гора, што му дава на турнирот и меѓународен карактер.
Организаторите најавуваат одлична организација и силна промоција, а турнирот добива и поддршка од реномирани фудбалски имиња. Амбасадори и промотери на годинашното издание се поранешниот репрезентативец Милан Стојановски, капитенот на Партизан Саша Илиќ, како и голем број познати имиња од македонскиот и балканскиот фудбал: Јане Николоски, Панче Ќумбев, Александар Лазевски, Марко Ѓорѓиевски, Стефан Ашковски и Христијан Драгарски.
Свеченото отворање е закажано за 8 август, по посетата на гробот на Трајан Куља, во чија чест и се организира турнирот. Групната фаза ќе се игра на 8 и 9 август, додека финалните натпревари ќе се одиграат в недела, на 10 август, попладне.
Покрај тимските награди (пехари и медали), турнирот нуди и индивидуални признанија, а посебен акцент се става на главната индивидуална награда – седумдневен камп во организација на ФК Партизан за најдобрите фудбалери во секоја категорија.
„Трофеј Трајан Куља“ се издвојува како турнир кој нуди повеќе од натпревари – емотивно доживување, фудбалска атмосфера, пријателства и спомени за цел живот. Благодарение на љубовта кон фудбалот и визијата на организаторите, Црнобуки повторно ќе биде центарот на младинскиот фудбал во Македонија.
