Женскиот фудбалски клуб Љуботен повторно ќе биде домаќин на квалификацискиот турнир во рамките на УЕФА Лигата на шампиони. На денешната ждрепка што се одржа во Нион, македонскиот шампион доби поволен противник за полуфиналето а тоа е тимот на НСИ Рунавик од Фарски Острови.
Во другата полуфинална двојка ќе се сретнат НСА Софија од Бугарија и ерменскиот Пјуник. Со договор меѓу сите учесници, Љуботен ја презеде одговорноста за организација на мини-турнирот, потврдувајќи ја повторно својата активна улога во европските натпреварувања.
Иако клубот е од Тетово, натпреварите ќе се одиграат во Скопје, на тренинг центарот „Петар Милошевски“ при ФФМ. Според првичниот распоред на УЕФА, турнирот ќе се одржи во периодот од 30 Јули до 2 Август.
