Словенечкиот прволигаш Радомље го потврди ангажманот на македонскиот фудбалски стручњак Југослав Тренчовски, кој од денеска е нов предводник на првиот тим. Искусниот 48-годишен тренер ќе ја води екипата во новата сезона со јасна визија и амбиции усогласени со стратегијата на клубот.
Тренчовски зад себе има богато тренерско искуство стекнато во Македонија, како и во странство. Тој важи за експерт во работа со млади фудбалери и се препознава по современиот пристап и фокусот на развој на индивидуалниот и тимскиот потенцијал.
„Радомље го следам последниве три години. Добро ми е познат проектот, идејата и насоката во која се движи клубот. Тука постои јасна цел за развој на млади играчи, за нивна афирмација и градење на квалитетни кариери – нешто што совршено се совпаѓа со мојата тренерска кариера“ , изјави Тренчовски.
Клубот изрази очекување дека со ангажманот на Тренчовски добива лидер кој може да обезбеди стабилност, континуитет и дополнителен квалитет во играта. Очекувањата се дека новиот стратег ќе придонесе за позитивен резултатски напредок и целосно ќе го оживее потенцијалот на младиот ростер.
Тренчовски во Радомље доаѓа од Кувајт, а во својата кариера ги предводеше клубовите Беласица, Хоризонт Турново, Кожуф и Брера. Беше и спортски директор во Академија Пандев, како и селектор на македонската репрезентација до 19 години.
