РК Вардар и црногорскиот репрезентативец Вуко Борозан, денес официјално, ја продолжија нивната соработка.
Корпулентниот лев бек ќе остане дел од „црвено-црниот“ тим и во натпреварувачката 2025/2026 година, што претставува значително засилување за клупските цели на домашната и европската сцена.
Борозан се врати во составот на Вардар во 2024 година и веднаш ја потврди својата вредност со искуство, физичка супериорност и прецизен, силен шут.
Неговата улога беше пресудна во освојувањето на трофејот во Купот. Продолжувањето на договорот ја потврдува цврстата релација и взаемната доверба меѓу играчот и управата на клубот.
Овој моќен лев бек, кој се прослави со своите проектили од далечина, веќе има богата историја со Вардар – во периодот 2016–2019 година беше дел од тимот кој доминираше со три шампионски титули, три Купа и три трофеи во СЕХА лигата. По неговото заминување од Скопје, настапуваше за Веспрем, Ал Араби и Ловќен.
Како дел од репрезентацијата на Црна Гора, Борозан го носеше националниот дрес на Европските првенства во 2014, 2016 и 2024 година.
Во 2017, пак, беше прогласен за најдобар спортист на Црна Гора – признание кое сведочи за неговиот квалитет и посветеност.
