Фудбалската федерација на Македонија (ФФМ) го усвои официјалниот календар за претстојната натпреварувачка сезона 2025/26 во Првата и Втората македонска фудбалска лига, како и за сениорското натпреварување во Купот на Македонија.
Според новите одлуки на Управниот одбор на ФФМ, Прва МФЛ ќе се игра на три дена од викендот – петок, сабота и недела, со што се овозможува поголема флексибилност и покриеност со ТВ преноси и медиумско внимание.
Втората македонска лига останува во стандардниот формат и ќе се игра секоја сабота, додека натпреварите од Купот ќе бидат одигрувани во текот на работната недела, односно во вторник, среда или четврток, со што се добива простор за подобра организација и медиумска експонираност на ова популарно натпреварување.
- Стартот на сезоната е веќе утврден:
Прва МФЛ ќе започне со есенскиот дел на 08, 09 и 10 август 2025 година;
Втора МФЛ ќе го има својот старт на 23 август 2025 година.
Ова официјализирање на календарот значи и старт на пресметките, подготовки и засилувања кај сите клубови кои со нетрпение го очекуваат новото првенствено поглавје. Очекуваме уште една возбудлива сезона на македонските фудбалски терени!
