Со три возбудливи натпревари синоќа започна третото издание на Меморијалниот турнир во мал фудбал „Благој Истатов 2025“, кој се игра на теренот во Чифлик маало во Струмица. Турнирот и годинава ветува големи возбудувања, а првата вечер потврди дека пехарот ќе се бара со голема борба на теренот.
Во првиот натпревар, екипата на Кеги Моби славеше со 1:3 против Компанија Атанасовски, при што го наметна своето темпо и доминација уште од самиот старт на турнирот.
Во вториот дуел од вечерта, Радио Импулс го демонстрираше својот напад со убедлива победа од 0:6 против ФК Дрвош, испраќајќи порака дека се сериозен кандидат за пласман понатаму.
Најмногу голови публиката виде во третиот натпревар, каде што Дивино во ефикасен меч го совлада тимот на Еклер Транс Пепелиште со резултат 5:3, во натпревар полн со пресврти и динамика.
Турнирот продолжува вечерва со нови возбудувања и нови мечеви во рамки на групната фаза, а „Спортска Мрежа“ ќе биде тука да ги пренесе сите моменти од овој спортски спектакл.
Да потсетиме, првопласираната екипа ќе освои 500.000 денари, а предвидени се и награди за второ, трето и четврто место, како и пехари, медали и спортски реквизити.
