Нашата најдобра таеквондо натпреварувачка Милијана Рељиќ освои бронзен медал на престижниот меѓународен турнир во Инсбрук, Австрија, кој е дел од Г1 серијата.
Рељиќ имаше одличен настап – во првото коло ја совлада германската натпреварувачка Ангелина Хуш, а потоа во четвртфиналето беше подобра од Хелена Кичема од Хрватска. Во полуфиналето загуби од Еквадорката Мел Мина, што ѝ го донесе бронзениот медал.
Со овој медал Милијана освои нови 3,6 поени за олимписката и светската ранг-листа. Во моментов се наоѓа на 12. позиција на олимписката и 11. на светската ранг-листа.
Инсбрук важи за еден од најсилните Г1 турнири, а ова е трет настап на Рељиќ на истиот, по кој конечно се закити со медал.
Гордоста не ја крие ниту нејзиниот тренер, Александар Ефтимов:
„Како нејзин тренер сведочам за нејзината истрајност, посветеност и дисциплина. Секој тренинг, секоја борба, секој пад и станување се дел од патот кој води кон Олимписките игри 2028 во Лос Анџелес. Продолжуваме со уште поголема мотивација“ – изјави Ефтимов.
