Второлигашот Охрид Лихнидос продолжува со засилување на тимот за новата сезона во Втората лига, а најновото име на списокот е добро познато на охридската фудбалска јавност – Димитриј Попоски повторно ќе го носи дресот на клубот.
22-годишниот бек, кој доаѓа од редовите на Брегалница Штип, ќе ја засили дефанзивната линија на Охриѓани. Станува збор за фудбалер со завидно искуство во домашниот шампионат – над 40 настапи во Првата македонска лига во дресовите на Борец, Работнички, Тетекс, Силекс и, секако, претходно за Охрид Лихнидос.
Попоски е и поранешен младински репрезентативец на Македонија, а неговото враќање претставува нов чекор во јасната амбиција на клубот – влез во Првата лига. Веќе претходно во клубот се врати и поранешниот капитен и голман Дамјан Серафимов, со што стручниот штаб испраќа сериозна порака дека Охрид ќе има респектабилен состав за новата сезона.
Од клубот најавуваат уште неколку нови имиња кои ќе бидат претставени во наредниот период, а целта е составување на тим кој ќе може рамноправно да се бори за највисок пласман и конечно враќање на охридскиот фудбал во елитата.
