По долгата пауза денес второлигашите им се вратија на натпреварите. На Градскиот стадион во Штип се одигра дербито на Истокот меѓу Брегалница и Осогово во меч каде „жетварите“ со гол од финишот го шокираа фаворитот за конечни 1:1. Иван Галевски стрелаше во првиот дел за 1:0 на полувреме, а во вториот дел и двете страни имаа шанси за гол. Симоски се покажа како џокер од клупа откако во 86. минута погоди за конечни 1:1 со што Осогово освои бод голем како планина.
Во Радовиш екипата на Детонит Плачковица предводена од старо-новиот тренер Горан Здравков, кој го имаше своето деби на клупата на радовишани во Купот каде забележа победа над Борец, го пречека екс прволигашот Скопје, а исходот од оваа средба на Градскиот стадион во Радовиш беше минимална победа за Детонит Плачковица со голот на Стефан Бабунски.
Арсими на домашен терен го пречека Новаци каде со минимални 1:0 со голот на Шефит Шефити забележа триумф.
На стадионот „Благој Истатов“ се соочија поранешните прволигаши Беласица против Победа, каде исходот беше поделба на бодовите. Јовов погоди за струмичани, а пак Кукески за прилепчани.
Борец со новиот тренер Даниел Стојановски денес против Вардарски се израдува на првата сезонска победа, откако велешани со 3:1 славеа во дуелот на повратниците во Втората лига. Флорент Османи погоди за 1:0 во 28. минута. На стартот од вториот дел со два брзи гола Борец ги реши сите дилеми за победникот, откако погодија Петров и Манасиев за 3:0. Во финишот на мечот Танов постигна гол за конечни 3:1.
Во Гевгелија се одигра дерби меч на Кожуф и Вардар од Неготино, каде домаќинот со 3:2 прокнижи нова победа. Гроздановски и Најденов погодија за 2:0 на полувреме. Во вториот дел Тодоров намалин на 2:1, а пак Гугуљанов постигна гол за 3:1. Во финишот на мечот Павлески ги постави конечните 3:2.
Ланскиот прволигаш Македонија ЃП на домашен терен се лизна откако одигра 1:1 против Каменица Саса. Славков погоди за 1:0 на полувреме, а Таневски во вториот дел ги постави конечните 1:1.
На „Билјанини Извори“ свое соочување имаа Охрид и Башкими, каде гостинот од Куманово во 92. минута со голот на Хасани стигна до победа од 0:1. Охрид сега е „закован“ на дното со само еден гол и повеќе од јасно е дека тука ќе има промени.
