Од 18 до 24 мај, главниот град Скопје ќе биде во центарот на тениската мапа со одржувањето на „Macedonian Open 2025“, АТП Челинџер турнир кој ветува тенис од највисоко ниво и незаборавна спортска атмосфера.
Натпреварите ќе се одржат на терените на ТК Југ во Градски парк, а настанот носи награден фонд од 100.000 американски долари, што го прави најпрестижниот тениски турнир што некогаш се организирал во нашата земја.
На турнирот ќе учествуваат врвни светски тенисери, талентирани млади ѕвезди и идни шампиони од глобалната сцена, но и нашите најдобри тенисери кои ќе ја имаат поддршката од домашната публика. Меѓу нив се Калин Ивановски, Берк Бугариќ, Горазд Србљак и Амар Хусеиновиќ, кои ќе имаат шанса да се докажат на домашен терен.
Организаторите најавуваат високо ниво на подготовка, одлични услови за игра и спортска манифестација што ќе остави траен белег во македонскиот тенис. „Macedonian Open 2025“ е не само спортски, туку и културен и туристички настан, кој ќе привлече внимание од поширокиот регион.
Остануваат уште многу малку до стартот, а подготовките се во полн ек. Љубителите на тенисот уште сега може да го резервираат своето време за да бидат дел од тениска недела што ветува неизвесност, квалитет и емоции на највисоко ниво.
