Големото мега дерби од 22. коло на Втората футсал лига на Македонија во Свети Николе заврши без победник, но со десет гола откако Овче Поле и Балкан ремизираа играјќи 5:5.
Ѓорѓи Султанов и Марио Панев беа двојни стрелци, а еден гол постигна Дамјан Благоевски, додека пак за гостинската екипа двапати стрелаше Пајтим Реџепи, а по еден гол постигнаа Џељал Мјаку, Ерол Далип и Јусуф Сулејмани.
Ваквото реми најмногу му одговараше на штипски Мал Ајакс откако со 5:9 славеше над ССК Скопје во Кисела Вода.
Иса Дурмишов постигна пет гола, двапати стрелаше Даниел Стојанов, а по еден гол постигнаа Теодор Наков и Марјан Зашков. За домашната екипа Антонио Крстевски постигна два гола, а по еден гол Бранко Ѓуровски, Реџеп Бислим и Борјан Цветановски.
Екипата на Конзули од Битола како домаќин играше во Ресен каде со 5:2 го доби Кораб од Дебар. За домашниот тим хет-трик постигна Лука Ѓорески, а по еден гол постигнаа Марјан Јовановски и Темур Емини, додека пак за гостинската екипа Ервин Елезоски и Дарко Блажевски беа стрелци.
Претходно, како што објави Спортска Мрежа екипата на СЕЕ Университи беше пресилна за Карадаку, извештајот од мечот е достапен овде, а пак Каршиака со десет гола го збриша Кратово, извештајот од овој меч е достапен овде.
