Македонскиот фудбал е повторно во центарот на вниманието поради нов скандал. Екипата на Гостивар во 85. минута го напушти теренот на дуелот против Работнички, во меч од 29. коло на Првата македонска фудбалска лига, откако гостите направија пресврт и поведоа со 1:2 во дербито за излез во фудбалска Европа.
Гостивар прв дојде до предност преку Ервин во 66. минута, но веднаш потоа стрелецот доби директен црвен картон поради груб старт. Работнички ја искористи бројчаната предност, израмнувајќи преку Ангелов во 79. минута, а само пет минути подоцна, Дејли го комплетираше пресвртот за 2:1.
Незадоволни од судиските одлуки, играчите на Гостивар, заедно со дел од раководството на клубот, предводено од газдата Уста и тренерот Панов, заминаа во соблекувалната. Работнички и судиите останаа на теренот во Маџари и чекаа евентуално враќање на противникот, но тоа не се случи.
Според пропозициите, Работнички ќе го добие натпреварот со службени 0:3, а против Гостивар ќе бидат поведени дисциплински постапки, што може да резултира со дополнителни казни.
- МОМЕНТОТ КОГА ГОСТИВАР ГО НАПУШТИ ТЕРЕНОТ:
Овој инцидент дополнително ја нарушува регуларноста на првенството, особено по неодамнешниот случај кога Воска Спорт го напушти теренот против Вардар, по што доби девет бодови казна и се повлече од понатамошно натпреварување во ПМФЛ.
Останува да видиме какви дисциплински мерки ќе се изречат против Гостивар и што ќе донесе тоа врз самиот тек на шампионатот.
