Големиот фаворит за првото место и баражот за Втора лига, екипата на Слога Виница тргна со победа, откако во Берово славеше со 0:3 над Малеш. Новиот стратег на некогашниот второлигаш од Виница, Емил Грнев победнички тргна со новиот клуб на патот истиот да го врати во Втората лига.
Победата беше најавена уште во првиот дел, кога Игор Ѓорѓиев во 16. минута и Дарко Николов во 18. минута погодија за 0:2 на полувреме. Во вториот дел Михаил Воинов во 58. минута погоди за конечни 0:3.
Во Дојран паднаа седум погодоци за голема победа на Хоризонт Турново од 3:4. Некогашниот вицешампион на Македонија, екипа која играше квалификации за Лига Европа, победнички тргна како повратник во Трета лига – Исток.
Благој Истатов беше двоен стрелец за гостинот од Турново, а по еден гол постигнаа во вториот дел Александар Черкезов и Васко Коцев.
За домашниот тим погодија Стојан Гушев и Петар Илиев во вториот дел, а во првиот дел Живко Гоцев си постигна автогол.
Карбинци со триумф од 2:0 над Ударник од Пирава ја започна новата сезона. Даниел Велинов во 21. минута погоди за 1:0, а во финишот на мечот или во 86. минута Трајче Ефремов постигна гол за конечни 2:0.
Овче Поле на домашен терен со 3:1 триумфираше над новајлијата Светлост од Зрновци со што третолигашот од Свети Николе кој пред неколку сезони беше шампион во Трета лига – Исток и играше бараж за Втора лига, но загуби од Арсими, победнички тргна во новата сезона.
По мирните мрежи и 0:0 во првиот дел, во второто полувреме гостинот преку Голчовски дојде до водство од 0:1. Домашниот тим преку Трендафилов веднаш израмни на 1:1 веќе во 53. минута, а потоа со два брзи гола домашниот тим направи пресврт. Панев во 76. минута погоди за 2:1, а Нацев ги постави конечните 3:1.
Брегалница од Делчево по еден година се врати во Трета лига – Исток, а на стартот од новата сезона тргна победнички, откако во Струмица со голот на Александар Илиев минимално од 0:1 славеше над Тиверија.