Денес ќе бидат одиграни натпревари од 17. коло на Првата женска фудбалска лига, кои требаше да се одиграат минатата недела, но поради големата трагедија во Кочани, каде животот го загубија 59 лица, сите спортски настани и натпревари беа одложени.
Денес се игра големото дерби меѓу шампионот Љуботен и лидерот Тиверија Брера, директно супер-дерби кое ќе решава за титулата, а кое се игра во Тетово.
Тиверија Брера е на врвот од прволигашката табелата со 38 бодови, а пак шампионот Љуботен е на второто место со 37 бодови и повеќе од сигурно е дека ќе има голема борба на теренот за трите бодови. Овој натпревар може да се покаже и како клучен, па денешни три бодови може да бидат и клучни во битката за титулата.
Љуботен ја брани титулата, а пак Тиверија Брера е на чекор конечно да ја донесе титулата во Струмица.
Познати се и судиите кои ќе ја делат правдата на сите натпреварите, а дербито на колото ќе го суди Батмир Бафто од Охрид, негови помошници ќе му бидат Елена Соклевска Илиевска од Скопје и Мишо Ѓорѓиески од Охрид.
Дербито во Тетово ќе започне во 16 часот, a натпреварот ќе се игра на Градскиот стадион во Кочани. Влезот ќе биде 100 денари, а сите собрани средства од влезниците ќе бидат донирани за настраданите од големата трагедија во Кочани.
Истатов на домашен терен како фаворит ќе се соочи против екипата на Ас Јунајтед од Струга, која ќе бара излез од резултатската криза, но во Пржино ќе биде тешко да се освојат бодовите. Истатов предводен од Кирил Изов атакува на шестиот сезонски триумф, а стружанки сезонава водат борба да го избегнат деветтото место на табелата кое води кон баражот за опстанок во елитата.
Правдата на овој дуел ќе ја дели Бењамин Ќерими од Скопје, а негови помошници ќе бидат Татјана Ивановска од Куманово и Цветанка Савеска од Јегуновце, а мечот ќе започне во 13:30 часот.
Во Битола ќе се игра градското дерби меѓу Топ Гол и Атлетико, дерби на две екипи кои го делат шестото место на табелата со по 11 бодови и атакуваат на три бодови.
Двете екипи се засилени, а Атлетико се засили и со две фудбалерки од редовите на Топ Гол, Анита Гоцевска и Сандра Триста кои пристигнаа од лутиот ривал.
Повеќе од сигурно е дека мечот кој ќе се игра на „Павел Шатев“ ќе биде вистинско и големо градско дерби, а на кое правдата ќе ја дели нашата најдобра меѓународна судијка Ивана Пројковска од Скопје. Нејзини помошници ќе бидат Ангела Домазетовска од Битола и Тамара Цветановиќ од Скопје.
Градското дерби во Битола е започне во 15:30 часот.
Речица на домашен терен ќе има тежок и неизвесен меч против фаворитот Скопје, каде домашниот тим и со бод би бил задоволен во трката да го избегне претпоследното место кое води кон баражот за опстанок во Првата лига.
Екипата на Скопје доаѓа како фаворит и ќе атакува на деветтата сезонска победа.
Драган Стевковски од Велес ќе биде главен судија на мечот, а негови помошници ќе му бидат Давор Дишлиевски од Кавадараци и Славче Шоповски од Велес.
Овој натпревар ќе започне во 15:30 часот.
Во рамки на 17. коло слободна ќе биде екипата на Каменица Саса.
